Rrëzë malit Sharr, përreth Lumëbardhit, pranë Kalasë shumë vjeçare, ndodhet qyteti i bukur i Zambakëve. Shumë legjenda, histori, vepra arti e kulture kanë kaluar dhe qenë pjesë e këtij qyteti, sa antik e piktoresk, aq modern e të brishtë.
Qyteti i Lidhjes Shqiptare, i besës së burrave të kombit, kryeqyteti historik e kulturor i shqiptarëve, Prizreni. Historikisht por, dhe sot është një nga vlerat më të mëdha kulturore të të gjithë shqiptarëve, është qyteti që ka lavdinë nga historia që ka bashkuar burrat e kombit në besëlidhjen e Prizrenit, i vendimeve të mëdha, Theranda e dikurshme, qyteti nuk na takon vetëm neve që jetojmë në Prizren, ne kemi respektin të e ndajmë së bashku me të gjithë juve.
Për të ardhur në Prizren nuk është e vështirë, ju mund të vini me aeroplan , fillimisht në aeroportin ndërkombëtar "Adem Jashari" i cili gjendet në Prishtinë, nga aty ju mund të merrni një taksi ose për të u nisur direkt për në Prizren, ose për të udhëtuar fillimisht deri tek stacioni i autobusëve në Prishtinë, dhe më pas ekzistojnë linja të rregullta të autobusit çdo 20 minuta. Në rast se juve vini nga aeroporti i Shkupit, mos u brengosni, janë linjat e rregullta dy herë në ditë përveç të dielës nga Shkupi në Prizren.
Udhëtimi me autobus është edhe më i lehtë, Prishtina nga Prizreni është larg vetëm 73 km, 90 minuta rrugë dhe ju do gjendeni në Prizren. Nga Peja, Ferizaj e Gjakova , për në Prizren ka linja të rregullta çdo 15-30 minuta. Prizreni mbanë linja të rregullta edhe me Turqinë, Italinë, Zvicrën , Gjermaninë dhe vende tjera të Evropës .
Në momentin kur do të jeni në Prizren, nga stacioni i autobusëve drejtë qendrës së qytetit do u nevojiten 15 minuta ecje.
Dhe tani ju jeni në Prizren, këtu jetojnë bashkë shqiptarët, turqit , boshnjakët dhe të tjerët të gjithë punojnë dhe zhvillojnë veprimtarinë e tyre, për një të ardhme më të mirë.
Prizreni është qytet i kulturës, ju mund të e quani edhe “qytet muze” sepse nga ajo që mund të vizitoni do mbeteni të habitur për trashëgiminë kulturore që ky qytet ka.
Ju mund të filloni nga objekti muze i Lidhjes Shqiptare të Prizrenit, një objekt me vlera të mëdha historike dhe kulturore për qytetin, dhe jo vetëm për të , po për të gjithë kombin shqiptar. Ju mund të vizitoni Kalanë e Prizrenit, një objekt nga i cili mund të shihni të gjithë qytetin, do keni ndjesinë sikur i gjithë qyteti tashmë është në duart tuaja. Në qytet do të keni mundësi të shkelni “Urën e Gurit” një simbol identifikues të këtij qyteti, dikur (por edhe sot) ishte bosht i zhvillimit pasi që bashkonte qytetin e ndarë nga Lumëbardhi.
Qyteti do u dhuroj në mes tjerash edhe bukurinë e Hamamit të Gazi Mehmet Pashës ,ndjesinë e Marashit me pamje të bukura me plot gjelbërim, në hyrje të tij do gjendeni pranë rrapit të vjetër 450 vite , i cili u ka rezistuar kohës dhe motit , një nga elementet identifikuese të Prizrenit. Qyteti do u dhuroj dhe pjesën më të bukur të tij, Shatërvanin. Sheshi si i tillë është në zemër të qytetit, është pikë takimi kryesor i rinisë prizrenase, rreth tij shtrihen kafenetë kryesore të qytetit, dhe mos harroni, krojet e shatërvanit i shoqëron një legjendë e bukur, “Kush do pi ujë Prizreni, do mbetet gjithmonë në Prizren”. Shtëpitë e vjetra të qytetit janë po ashtu një pikë e bukur referimi për të u vizituar, një nga më të njohurat është edhe shtëpia e Sheh-zadës e ndërtuar në fund të shekullit të XVIII. Krojet në numër mjaftë të madh në qytet, në ditët e verës do u japin freskinë dhe ndjesinë e bukur të ujit të freskët .Qyteti muze u prezanton para jush edhe muzeun arkeologjik- Sahat Kulla, i cili është i vendosur në hapësirat e hamamit, në të janë të vendosura material arkeologjik që ka një shtrirje mjaftë të gjerë në këto epoka: neolit i hershëm, e neoliti, periudha e bronzit, periudha e hekurit, periudha romake, mesjeta e hershme dhe mesjeta e vonë. Gjatë vizitës që do i bëni qytetit ju mund të vizitoni edhe objekte të kultit, të besimit islam dhe atij të krishterë, Xhaminë e Sinan Pashës, e cila edhe pse nuk është më e vjetra , padyshim është më e bukura , është njëra ndër veprat më të bukura të arkitekturës islame në Ballkan , Kishën e Shën Premtes e ndërtuar në vitin 1307 , që nga viti 2006 është në listën e UNESKO-së, Kërëk Xhamia, Xhaminë e Gazi Mehmet Pashës, Kishën e Shën Gjorgjit, Xhaminë e Saraçëve, Kisha “Zonja Ndihmëtare” ,Famullinë e Zymit, Tyrben e Gazi Mehmet Pashës por, edhe shumë objekte tjera të cilat mund të i vizitoni gjatë qëndrimit tuaj në qytetin tonë.
Qyteti si i tillë ka pasuri natyrore të cilat janë atraksion në vete, peizazhet e bukura ,liqenet , por edhe Prevalla e bukur është vend të cilin ju duhet të e keni si destinacion nëse vizitoni Prizrenin.
Prevalla e shtrirë në territorin e Komunës së Prizrenit, ofron mundësi për të zhvilluar turizmin malor, veror , dimëror , aktivitetet në natyrë dhe ekskursione turistike.
Qyteti u ofron mundësi të ndryshme, dimrit mund të skijoni në Prevallë dhe në Shtëpinë e Malorëve, ndërsa në disa vende mund të behet edhe “snowboard” ekstrem.
Bashkë me monumentet kulturore , pasuritë natyrore, diversitetit kulturor e religjioz, Prizreni u ofron juve si vizitor i ardhshëm mikpritjen dhe bujarinë. Me njerëz modest dhe shumë miqësor, në Prizren ju do të ndiheni sikur në shtëpinë tuaj.

Shkruan : Veton Neshati