Naupliu(greq. Nauplios, lat. Nauplius) - i biri i Poseidonit, zotit të detit dhe nimfës Aminona, mbret i Eubesë.
Figura e tij është mjaft e paqartë, ndonëse mund të ngushllohemi poqese e kemi parasysh faktin se ky pohim vlen edhe për një numër mjaft të madh të sunduesëve historikë. Naupliu kinse është nga Argu. I ka pasur tre djem, prej të cilëve dy merreshin me ngashnjimin e grave «të mashkujve të tjerë, ndërsa i treti, Palamedi, me shpikje. Kur në kohën e luftës së Trojës akeasit e dënuan Palamedin me vdekje si tradhtar, Naupliu në mesin e grave të mbretërve akeas i përhapi lajmet mjaft bindëse dhe të caktuara, se bashkëshortët e tyre janë të pabesë dhe se me të madhe po argëtoheshin me trojanet e robëruara. Gjoja kjo e ka shtyrë edhe Klitemnestrën, bashkëshorten e kryekomandantit të ushtrisë akease, që ta shkelë besnikërinë. Për pabesinë e bashkëshortes së Idomeneut, mbretit të Kretës, u kujdes vetë me intriga të ndërlikuara në të cilat i përzieu edhe Leukun, djalin e Idonmeneut. Kur pas luftës dhjetëvjeçare akeasit e pushtuan Trojën dhe u kthyen në atdhe, Naupliu i mashtroi anijet e tyre me flakë te rrejshme kah brigjet shkëmbore të Eubesë, ku shumica u fundosën. Sipas lajmeve të mëvonshme, gjoja se, gjatë luftës së Trojës, i pushtoi dhe i shkatërroi dhjetë qytete të Idomeneut, dhe pas kthimit të tij, e dëboi nga Kreta. U vranë në mënyrë të palavdishme, në të njëjtën mënyrë në të cilën ua ka shkaktuar vdekjen shumë akeasve me rastin e kthimit të tyre nga Troja: e mashtruar me flakën e rrejshme anija e tij natën u përplas në shkëmb dhe ai u mbyt në det.
Homeri nuk e përmend Naupliun. Edhe autorët antikë e kanë konsideruar "njërin prej kreshnikëve të vonë" me famë të dyshimtë. Lajmet për të, si duket, janë nga Kyprdiat e Stasinit ose të Hegesinit. Më vonë disa elemente të tyre paraqiten në përpunimet e kohës më të re, në mesin e tyre edhe në veprën e dytë të "trilogjisë trojane" të Euripidit, Palamedi, të vitit 415 para e.s. Poqese e përmbledhim çdo gjë ç'është shkruar ose treguar për të, Naupliu do të ketë jetuar tepër gjatë, madje edhe për vetë kriteret e miteve. Në mënyrë epizodike paraqitet edhe në kohën e Herakliut, madje si burrë në moshë (Nestori atëherë ishte ende fëmijë i vogël), por si burrë në fuqi të plotë pas luftës së Trojës lufton në Kretë.

Derguar nga VALENTIN BATALAKU - Slloveni